ADEUS A XOSÉ NEIRA VILAS

Esta fin de semana comezaba con malas novas... a noticia do pasamento do autor de Memorias dun neno labrego, que nos  deixaba para sempre e marchaba ao carón da súa compañeira de vida Anisia.
 Xosé Neira Vilas finou na súa casa de Gres, Vila de Cruces aos 87 anos. Autor, asemade, doutras obras moi coñecidas: Cartas a Lelo, Querido Tomás, Cartas no rodicio, O cabaliño de buxo, A Marela taravela e un longo etcétera que abrangue dende a narrativa, ata a  poesía e o ensaio.
Ademais dun grandísimo escritor, comprometido coa lingua,  sufriu a emigración en Cuba e na Arxentina (onde descubriu a súa identidade galega), foi un ser humano excepcional moi solidario co mundo marxinal e coas causas xustas.
O seu corpo foi velado no Panteón dos Galegos Ilustres en San Domingo de Bonaval e o enterro na súa aldea de Gres o sábado pasado.

 Podedes ver máis información AQUÍ

«Eu son Balbino. Un rapaz de aldea. Coma quen di, un ninguén. E ademais, pobre». 

ACHÉGASE O NADAL...

Estamos ás portas das vacacións do Nadal...xa sabemos que estades estudando moito e que pouco tempo hai para outra cousa que non sexa preparar exames, pero pedímosvos un pequeno esforzo e colaboración entre tod@s para preparar a nosa felicitación  deste ano que logo remata.
Un ano máis, queremos que vós sexades @s artífices da tarxeta para parabenizar estas festas a toda a comunidade educativa do IES Enrique Muruais.
Dende o ENDLG propoñémosvos que participedes na elaboración da mesma; as bases están no cartaz que  de seguido vos imos subir no blog... iso si!! LEMBRADE que o lema da mesma ten que ser en GALEGO NORMATIVO porque moitas veces hai creacións plásticas moi chulas que non podemos premiar porque non están escritas en GALEGO e isto conta moito á hora de seleccionar as mellores.
Este mesmo cartaz coas bases está exposto polo centro, nos taboleiros.

Queres recibir un agasallo antes do Nadal? Pois ANÍMATE e PARTICIPA!!!

Tedes de prazo ata o día 7 de decembro