Fun fun fun!

 Chega o Nadal e con el a felicidade, as ganas de comezar un novo ano, e os desexos. Por iso, o noso alumnado fixo unhas fermosas tarxetas para felicitarnos esta época de fantasía e soños. 

Non podemos estar máis namorados das creacións deste ano, pois non hai ningunha que non nos mostre a creatividade que teñen os seus autores. Pero, coma en todo, tivemos que elixir as máis elaboradas para decidir quenes serían os gañadores do concurso. E... non sabedes o dfícil que foi para o equipo do EDLG elexilos!!!

Porén, complacenos anunciar os gañadores/as:

1º posto para Álvaro de 2º ESO

2º posto para Marcos Suárez de 2ºESO

3º posto para Antonella de 3ºESO

Noraboa rapaces! 

Doutra banda, aquí vos deixamos o resto de tarxetas, para que compartades a nosa ilusión polo traballo realizado e vos namoredes delas coma nos fixemos!!!

 

 

Chega decembro...

 Chega decembro e con el o Nadal. Época de turrón, de doces e de comidas familiares. Época de soños e esperanzas. Época na que pedir desexos está permitido. Non, mellor dito, é obrigatorio!

Por iso, dende o EDGL deixamos ao noso alumnado soñar e usar a súa imaxinación... Polo que vos pregunto, que se estará a cociñar dentro das catro paredes do noso instituto?

Queredes unha pista? 

Alá vai!

Día contra á Violencia de Xénero

 É ben certo que hai días que ogallá non tiveramos que celebrar. Pese a iso, dende o EDGL traballamos estas semanas moi duro para concienciar ao noso alumnado sobre a violencia e, sobre todo, sobre a violencia de xénero. Pois, a educación é unha parte importante para erradicar este mal que habita na nosa sociedade.

Con todo, estamos moi orgullosos e orgullosas de ver o esforzo que, unha vez máis, se viu reflectido na pequena familia que formamos o IES Enrique Muruais. Conseguimos máis de cen mans que representan o rexeitamento á violencia de xénero, cen mans que abrazan a dignidade humana e, sobre todo, cen mans que foron feitas con cariño e escritas con palabras positivas que representan o amor, o cariño, a solidaridade e o apoio ás vítimas de violencia de xénero.

Aquí vos deixamos unhas fotos do traballo de profesorado e alumnado. Alumnado, que lle dá as costas á violencia, pero sen torcer a vista cara outro lado. Así é como o representaron hoxe algúns dos que forman parte do EDGL:

 

 

 

 

E recordemos que, como dicía Frida Kahlo (pintora mexicana), "amurallar o propio sufrimento é arriscarte a que te devore dende o interior".
 

Mes da ciencia

 Dende o EDGL tamén quixemos poñer o noso gran de area neste mes onde, dende os máis pequenos aos máis grandes do instituto, están a participar. 

A nosa contribución faise dende a lectura, pois xa se sabe, ler e coma entrar nun mundo novo onde a fantasía e a realidade se mesturan. E esa e a nosa idea! Que as letras e as ciencias se collan da man e se apreten forte.

E sen máis, aquí vos deixamos unha foto con algúns dos títulos que suxerimos como lectura dentro deste marabilloso mes científico.

 

O Feitizo da Ciencia

 Este mes celebramos o mes da ciencia. E nada mellor ca comezar con este precioso manifesto que foi lido no centro. Compartímolo con vós:

Está en todas partes. Dentro do teu ordenador, no microondas e na neveira da cociña, en todos os medicamentos que tomamos de cando en vez, nos instrumentos de medición que hai nos hospitais, nas lámpadas que dan luz cando marcha o Sol, no motor do coche e do patinete eléctrico... chámase ciencia e é unha das ferramentas máis poderosas que desenvolvemos os seres humanos para tratar de comprender como está organizado e como funciona o mundo. A ciencia non é unha cousa escura que só se fai en complexos laboratorios, senón que, por riba de todo, é unha maneira de pensar, unha actitude para chegar ao coñecemento. Consiste en observar a natureza con paciencia e curiosidade, dun xeito rigoroso e meticuloso, co obxectivo de, pouco a pouco, descubrir os mecanismos que se agochan detrás dunha planta que agroma, dun bebé que comeza a camiñar, dun volcán en erupción ou dun medicamento que elimina a dor de cabeza. O traballo da ciencia pode facerse cun lapis e un papel, anotando o paso de aves migratorias, propoñendo unha hipótese brillante para explicar algún fenómeno da natureza, ou desenvolvendo unha solución matemática para calcular a danza aérea dunha bolboreta. E, por suposto, o traballo da ciencia tamén se fai nas instalacións que hai nos centros de investigación e de ensino, desde as máis simples ata as máis especializadas. En Galicia temos a fortuna de poder facer ciencia de calidade nos laboratorios das universidades e doutros centros de ensino. O importante e botarlle ilusión, paciencia e moita imaxinación. Pero ademais de facer ciencia, todos podemos gozar do traballo, das achegas e das vidas das científicas e dos científicos mergullándonos nos libros. Cada libro é unha viaxe interestelar á mente doutras persoas, ás súas aventuras, penas e alegrías. Nas nosas bibliotecas podemos gozar sen límite con relatos abraiantes sobre o funcionamento do cerebro, a vida das abellas ou a construción dun aeroplano. Cada libro é unha xoia capaz de alimentar e de estimular a mente. E ademais podemos gozalos na nosa lingua, en galego, porque a ciencia fala todos os idiomas, pode emocionar todas as mentes. O mes da ciencia en galego nas bibliotecas é unha oportunidade estupenda para deixarse enfeitizar pola maxia dos libros e do coñecemento que atesouran. Pero, ollo; esta actividade é profundamente aditiva e, sen que un se decate, pode acabar gozando da lectura todos os días do ano.

 

Xurxo Mariño Alfonso Dep. Legal: C 1366-2020 Profesor, investigador e divulgador científico

Día das escritoras

 Aínda que tarde, queremos pechar os acontecementos do mes de outubro. E cal é a mellor maneira? Co traballo do noso alumnado, que unha vez máis se implicou no Día das Escritoras.

Celebrouse o día 19 na Biblioteca, e estamos moi contentos de dicir que tanto o Departamento de Lingua Galega como as titorías de 1º e 2º de ESO colaboraron aportando traballos sobre catro escritoras: Xohana Torres, Marica Campo, Teresa Moure e Andrea Maceiras.

Queremos darlle as grazas a este alumnado pola implicación, e polas ganas de aprender máis sobre a nosa cultura.

Lembrade: "O coñecemento fainos libres"

 

 

Seguimos co Samaín. É a hora do léxico!

Dice un cantante galego, Xoel López "sen as palabras, dime, que nos queda?". 

E é ben certo que sen palabras non somos nada. É por isto que dende o equipo de EDGL e, sobre todo, dende o Departamento de Lingua Galega, o alumnado de 1º de ESO estivo a traballar no léxico referente ao Samaín.

Ademais, este ano contamos con nenas de orixe marroquí e chinés, coas que estamos a aprender moito da súa cultura e da súa lingua. Pero nós, queremos que pouco a pouco tamén coñezan a nosa e se acheguen ao noso fermoso galego
. Desta maneira uns aprendemos dos outros. E, que viva a interculturalidade!

Aquí vos deixamos unha mostra dalgunhas das palabras coas que o alumnado estivo a traballar durante toda a semana pasada. 

Esperamos que vos gusten. Nós estamos moi emocionados coa aprendizaxe cultural e léxica de todo o alumnado e, sobre todo, do resultado final.

Mostraremos máis sorpresas? 

Debedes esperar a próxima publicación.

O Samaín

 O Samaín é unha festividade de orixe celta. E preguntarédesvos, por que se celebraba? 

Pois ben, como pobo rural que eran, os celtas dábanlle moita importancia a colleita, polo que, a noite do 31 de outubro ao 1 de novembro celebraban o final da tempada de recolección, comezando así o Ano Novo para eles.

Pouco a pouco o cristianismo foi chegando a toda Europa, e no século VII o Papa Bonifacio VI, decidiu fixar unha data para celebrar un día de "Todos os Santos", día que nun principio foi estipulado en maio, ata que Gregorio III, intentando aplacar as festividades paganas, fixou o día como o 1 de novemebro. De maneira que o día 31 serviría para preparar a festa. 

Esta tamén é a orixe do Halloween, pois esta palabra provén de All Hallow's Eve, é dicir, Día de Todos os Santos. Esta festa moi extendida polo mundo anglosaxón chegou ata nós, a pesar de que as nosas raíces estean no pobo celta. 

Polo tanto, dende o equipo de EDLG tratamos de fomentar o noso pasado, as nosas costumes como galegas e galegos que somos. É por isto que a semana pasada, todos os profes do equipo e o alumnado fixeron do centro un lugar máxico, onde as pantasmas, as caveiras e os morcegos tiveron un protagonismo especial. 

Deixámosvos aquí unha mostra da decoración do noso Samaín.

Pero, aínda temos máis cousas das que falar! 

Non vos perdades o próximo post.

De que é época?

 Cheirades iso? 

Algo se está a cocer no instituto... 

Pronto o saberedes, pero... o que se cociña lentamente soe saber moi moi ben. 

Aquí vos deixamos un adianto!

BENVID@S AO BLOG DO EDLG CURSO 2020-2021

 Ola! Damos comezo a un novo curso dentro dunha situación excepcional que vén marcada pola pandemia da Covid19.

Nós, aquí seguimos, traballando pola lingua e pretendendo que a nosa vida académica continúe coa maior normalidade posíbel.

Imos presentarvos o novo EDLG neste curso 2020-2021

Profesorado

• Elena Aller González (Departamento de Música)
• Cristina Díaz Varela (Departamento de Lingua Galega)
• Yajaira Enríquez Martínez (Departamento de Xeografía e Historia)
• Ana María Loriente Acebedo (Departamento de Educación Plástica e Visual)
• Blanca Mª Rodríguez Díaz (Departamento de Latín e Grego)
• Ángeles Rodríguez Llamazares (Departamento de Lingua Galega. Coordinadora do EDLG)

Alumnado

• Marcos Acebo Linares (1º ESO A)
• Paulo Ramallal Vázquez (1º ESO B)
• Yasmín Cabanas Quintana (2º ESO)
• Marcos Macía González (3º ESO)
• Miguel Rivas Castro (4º ESO)
• Juan Díaz Alonso ( 1º BAC)
• Sara Martínez Pumares (2º BAC)

Representante da Administración e Servizos

• José Vega Chao