ENTREGA DE PREMIOS FINAL DE CURSO

 O luns 20 entregáronse os premios ao concurso de marcapáxinas polo Día do Libro e tamén pola actividade anual do Videocotián. Os premios consistiron en vales de material escolar para gastar na libraría Papeleo da Pontenova.

Ana Hernández Martínez de 1º ESO foi a premiada polo marcapáxinas gañador.

 Nuria López Torviso, Carla Rodríguez García (1º BAC) e Marcos Suárez Capón (3º ESO) recibiron premios pola súa participación  no Videocotián, mentres que Álvaro Rodríguez García de 3º da ESO levou o maior premio pola súa constante participación ao longo de todo o curso neste concurso de microvídeos.

                                Parabéns a todos/as!!!

Moitas grazas pola vosa colaboración e dende estas liñas animámosvos a seguir participando para o vindeiro curso.

 

OBRADOIROS DE PORTUGUÉS

A Deputación de Lugo, a través da súa Área de Cultura, concedeunos ao noso centro dous obradoiros de portugués. Onte, venres, impartidos pola AGAL e durante 100 minutos que foi o que durou cada obradoiro, alumnado de 2º e 3º ESO  tivo a oportunidade de achegarse  dun  xeito lúdico e moi entretido ao mundo da lusofonía.

Co emprego da música e doutros recursos visuais,  a relatora amosoulle ao alumnado que entre o galego e o portugués existe  proximidade canto ao léxico e á ortografía. Ao mesmo tempo, serviu esta actividade para concienciarnos da importancia de coñecer e falar a nosa lingua moito máis aló das fronteiras galegas

.

ELISA E MARCELA NO INSTITUTO

 Onte venres 27 de maio, tivemos unha visita moi especial. Dentro da programación do EDLG estaba prevista a actuación do grupo de teatro A Panadaría coa súa obra Elisa e Marcela. É esta a historia de dúas mulleres que primeiro son amigas e logo esa amizade dá paso a unha relación amorosa que vivirán ás agachadas aló polo final do século XIX.

Foi na Casa da Cultura ás 12:30. Só cunha tea no escenario montada entre dous mastros. Todo o demais sobra porque a intelixencia póñena elas, Areta, Noelia e Ailén. Todo se move ao redor da súa creatividade, do inxenio e da arte coa que transforman o teatro e as súas historias. Rotundo éxito que arrancou os aplausos tanto do alumnado como da xente adulta que asistiu á función.

As Letras Galegas no IES Enrique Muruais

Celebramos as nosas Letras adicadas este ano ao poeta valdeorrés Florencio Delgado Gurriarán para dar a coñecer a figura deste autor. Para iso, o EDLG e o departamento de Galego propuxeron diversas actividades para o alumnado da ESO e de 1º BAC. O título da exposición leva por nome De Rosalía a Florencio e inclúe actividades plásticas e de poesía realizadas dende o mes de febreiro ata o de maio polos departamentos de Bioloxía, E. Plástica e Visual, ademais do departamento de L. Galega. A biblioteca do centro tamén colaborou co EDLG na exposición da obra de Florencio Delgado, así como no recitado de poemas do autor que se levou a cabo co alumnado do centro. 

VIDEOCOTIÁN Nuria 1º BAC O son do ar Luar na Lubre

Co fermoso tema O son do ar do grupo de música folk Luar na Lubre, a alumna de 1º BAC, Nuria López Torviso preséntanos o seu videocotián deste mes de maio. Moitas grazas, Nuria pola túa colaboración

ADEUS A DOMINGO VILLAR

 

Na Semana das Letras Galegas temos unha mala nova que dar, o  súbito pasamento de Domingo Villar, o escritor máis representativo da novela negra galega.  Domingo Villar foi creador da figura do inspector Leo Caldas na súa  triloxía Ollos de auga, A praia dos afogados  e O último barco. Sempre nos quedará o seu legado.

VIDEOCOTIÁN Marcos 3º ESO Cantiga de amigo Fuxan os Ventos

 Nesta ocasión, Marcos de 3º ESO quixo facernos chegar para o VIDEOCOTIÁN un coñecidísimo tema, e non por iso menos bonito, unha cantiga de amigo do grupo de folk Fuxan os Ventos. Bonitas imaxes, Marcos, as que presentas neste vídeo. Grazas por colaborares nesta actividade!! Anímaste ao seguinte??